那些年,我們一起Chok過的秘技

p1

以前打機,無華麗嘅畫面,無震撼嘅音效,講緊嘅係14″電視機,插嘅只係紅、白、黃AV線,幾個朋友"烘"埋一齊睇,都玩得不亦樂乎。
以前嘅遊戲,遊戲性強、 好耐玩,甚至好多遊戲,爆機只係個傳說,無返咁上下技術,唔煲返咁上下時間,根本無可能爆機,相信唔少朋友仲有好多未爆機嘅遺憾喺心中。

另一樣令人又愛又恨嘅,就係遊戲內隱藏嘅秘技喇,當年喺一個未有互聯網嘅世界,秘技只能夠以以訛傳訛嘅方式流傳,好多方法都要親自印證,先知真假。
但係一啲遊戲入面加咗所謂嘅秘技,令遊戲增添咗一份神秘感,更加引人入勝。
以下係小編喺秘技界入面嘅丁點經驗,同大家分享一下:

p6CSnp_Wlp_Wpw

上上下下左右左右BA start
要數最經典嘅,莫過於呢個組合,而識得呢組經典秘技嘅朋友,相信都有返咁上下機齡,呢個組合用過喺好多遊戲上,無記錯小編第一次接觸呢組秘技,係"魂斗羅I “,之後知道嘅有"沙羅萬蛇I “、"兵峰I “……等等 ,效果係:30條命、full gear等等,之後以上遊戲嘅續集都出現咗惡搞版,輸入之後會變為自爆。
所以之後引伸出以下公式。

 

右左下上AB start
“魂斗羅II"、"沙羅萬蛇 II"之後,上上下下左右左右BA start呢個組合已經無正面效果,變咗為右左下上AB start。

 

 

Ikarijp

ABBA
出現喺"怒I",要2P(雙打)先有效,如其中1P死咗,只要另1P未死,輸入ABBA,就可以無限復活,但如果輸入唔切,兩位都死咗嘅話,咁就sorLy了。

 

 

street-fighter-ii-map

街頭霸王II _八人版(無影撻、癡身、定格、熄機)
出現喺"街頭霸王II"呢四招,嚴格嚟講,似Bug多過似秘技,而無獨有偶,都出現喺軍佬身上。
當時嘅出現,風頭可謂一時無兩,就算唔係機迷,都專程去機舖一睹"無影撻"嘅風采。
(由於操作上有一定嘅複雜程度,不在此詳述)

 

 

hqdefault

街頭霸王I(出兩個波)
講緊嘅並唔係"葵花寶典",第一集無呢個版本。
但係呢隻遊戲都不乏經典傳說,有人話去非洲,有人話出一陽指,不過通通都係流料。
但有一樣唔太多人知嘅堅料,就係出兩個波。
不過限制條件都好多,只限第二版打忍者時,忍者會跳起向下掟飛鏢,就啱位置,令飛鏢掟中角色下身,被掟中前先出第一個波,中鏢後角色會被取消硬直,當第一個波未消失前,再出第二個波,畫面上就會出現兩個波了。當然實際上係其實無乜作用嘅。

 

 

417851807_m

特殊部隊(連射、雷射砲)
作為射擊遊戲,最煩惱莫過於要瘋狂射彈,簡直人都顛。
特殊部隊只要快速輸入射彈制達一定程度同時間,角色就可以出現慣性連射,只要喺角色死亡之前,都可以㩒實射彈制做連射,輕輕鬆鬆專心避彈。
而另一樣更殺食嘅秘技就係,只用齋彈打死第一版大佬(超大坦克車),大佬身後就會出現一舊正方體嘅黃金磚塊,食咗之後就可以擁有貫穿任何物件嘅雷射砲,過版自然事半功倍,當然死咗就閣下自理了……

 

 

200907221634193262

足球小將II(角色大調亂)
首先一定要用紅白機,而且一定要插Joystick,因為操作上就會變成兩個制都操控1P,之後去到換人版面,平時嘅設定係龍門只可以換龍門,但插上Joystick後,因為都係1P,換人時只要一個制拉上,一個制拉下,換人指標會慢慢向下順滑移動(正常係一格一格),將指標移到兩格中間,再向右拉,就可以進入換龍門嘅範圍,呢個情況下,你就可以換林源三出嚟踢,換任何人入去守龍門喇。
唔講大家一定唔知,泰來嘅守龍門能力原來仲勁過林源三嫁(伸脷)。

 

小編玩過嘅遊戲唔算多,不過所講嘅都係一啲親身經歷,並唔係"街頭霸王I"去非洲之類嘅傳說(笑),又忽然間無聊諗起,覺得可以同大家分享下,所以胡亂寫咗幾隻字,請勿見怪。

而遊戲嘅秘技可以話多如天上繁星,講三日三夜都講唔晒,所以不能盡錄,好多如"孖寶兄弟"無限1UP、秘道……等等,都無提到。
而且好多實在係唔記得咗……
所以非常歡迎大家補充同參與討論,懷緬一吓小時候嘅童年回憶。

https://www.post76.com/x2/forum.php?mod=viewthread&tid=238178&page=1&extra=#pid3797463


🙋‍ ★ 想睇版友討論以上文章?? 《點我進入討論》

🏠 ★ Post76網店經已開幕 《store.post76.hk》

245141525

關於245141525

245141525: 亞祺,BEYOND教信徒,聽BEYOND的歌長大,流住BEYOND的血,經[一次意外]得以看破凡塵,豁達人生,自此致力宣揚BEYOND精神,亦希望將崇拜BEYOND的態度,用於每一件事,仍在努力中......

觀看所有 245141525 的文章

相關文章